Kusenemibuzo engaphendulekiyo ngepolisa elidutyulwe eMqanduli likunye nabarhanelwa abangaziwayo ekuvakala ukuba bona bakwazile ukubhungca, ngelixa lona lidutyulwe lahlanza iselwa.
Eli polisa ise yindaba yakwamkhozi eyegama lalo, kuvakala ukuba belisi Sajini lisebenza kwisikhululo samapolisa e-Madeira eMthatha, yaye kufunyenwe kulo ummpu ekufumaniseke ukuba webiwa e-Hillbrow eGoli ngomnyaka ka2021.
Ngokwengxelo yamapolisa kuvakala ukuba ngeCawa umhla wesithathu (03) November 2024, amapolisa ebelandela umkhondo emva kokubikelwa ngamadoda axhobe afe amacala eMqanduli.
Kuvakala ukuba amapolisa ecandelo le TRT, athe ahlala ezithendeni ekhangela la madoda eneni avile ngoonokrawuzana ukuba akwindawo yentselo kwilali iDobe kwalapho eMqanduli. Iingxelo zihambisa zithi abarhanelwa emva kokubona amapolisa baye bababeleka abasicatyana bebhekisa kumacala ohlukeneyo, kodwa omnye kubo obengasekuphumeni kulo ndawo yentselo uqalise ukuthulula iimbumbulu ejolise emapoliseni, nawo kuvakala ukuba abuyise ngomlilo kwangathi kuduma izulu. Ngelixa kujongwa le ndoda (42), ekuvakala ukuba idutyulwe lahlanza iselwa kulo mqhoqhozwano kufumaniseke ukuba lipolisa ebelingaphangelanga lase Madeira police station.
Ukuza kwethu kushicilelo uphando oluqhutywa yi-IPD belusaqhubeka kungekazeki ukuba eli polisa bekusenzeka ntoni ngelixa nawo amapolisa ebesephantsi phezulu ekhangela abarhanelwa aba bathe babaleka xa bebona wona.
