Bashiyeke bekhexe imilomo abahlali bedolophu yaseLusikisiki kulandela ukufumaneka komzimba womntu wasetyhini sele itshoba lilele umbethe kwindawo yamangcwaba eNew Town kwakuyo la dolophu. Ecaleni kwalo mzimba kufumaneke izixhobo zokuzikhusela xa kusenziwa isondo (condoms) zilapha ecaleni kwawo sele kubonakala ukuba zisetyenzisiwe. Amapolisa athi lomzimba ububonakala ingathi ukrwitshiwe ngenxa yeempawu ebezibonakala emqaleni nasezingqinibeni.
Othethela amapolisa kwisithili iOR Tambo u-Captain Welile Matyolo, uthi eli nina liqikelelwa phaya kwiminyaka ekumashumi amathathu (30), yaye linenwele eziphothiweyo (dreads) yaye liyakhanya ngokwebala. Lo kaMatyolo ubhenele kuye nabani olahlekelwe ngumntu ukuba eze kubacuphi kwisikhululo samapolisa eLusikisiki ukuzofanisa lo wasetyhini ofunyenwe ngecawa umhla we02 kuNovember 2025. Okanye angatsalela umnxeba kwintloko yabacuphi enguColonel Kufa ku083 427 9656. Uphando ngalo mba lusaqhuba nanjengoko amapolisa kula mmandla esathe bhazalala ekhangela abenzi okanye umenzi wobubi.
