Bathe abahlali baseNogbozana eLusikisiki besathe njoo amehlo kwityala eliqhuba de kube ngomhla we19 kuSeptember 2025, lokubulawa kwabantu abalishumi nesibhozo kula lali, kwethuu esokubulawa kwamanina amabini ngoLwesibini umhla wesihlanu kuAgasti 2025.
Ingxelo yamapolisa idiza ukuba indoda eneminyaka eyi42 yiyo etyholwa ngolu dubulo nekuvakala ukuba idubule unkosikazi wayo ona 49 yeminyaka kwakunye nobesakuba sisinqandamathe sakhe sona esina 22 yeminyaka.
Isithethi samapolisa ephondweni leMpuma Koloni uBrigadier Nobuntu Gantana udize ukuba le ndoda iqale yadubula isithandani esi kwindawo yokwehlisa unxano (tavern) kwindawo yakuChithwayo ekwalapho eNgobozana, emveni koko waqhubeka waya ekhayeni kwindawo yaseUnity Park kwaseNgobozana watshisa ngelophisi emfazini ngelixa ebelele amatyeli aliqela nakuye lahlanza iselwa.
Amapolisa aqhubeka athi emveni koko uthe wabaleka apho kwindawo yexhwayelo ngesithuthi sosapho nesifunyenwe sishiywe ze umzimba wakhe wafumaneka kwilali yaseGqathula esigangeni kukhona i9mm pistol ecaleni kwawo nekukrokreleka ukuba kungenzeka ukuba uzidubule. Unonobangela woku ubungekaziwa, kodwa umfi lo kuvakele ukuba ngulowo ebesoyanyaniswa nesiganeko saseNgobozana.
