Bashiyeke bekhexe imilomo kwisitalato iGcolotela kwilokishi iNgangelizwe eMthatha, ngelixa kusehla isiganeko sokuhlatywa kwenina elinamashumi amathathu nesine (34) yeminyaka lisweleke lelinye elineminyaka engamashumi amathathu nothoba (39). Konke oku kwenzeke ngobusuku bangoLwesibini umhla wesibini (02) kuJune 2026.
Kudizwa ukuba bekubangwa indoda kanti esi siganeko senzeke phaya ngezithuba zentsimbi yeshumi elinanye ebusuku kwindawo abahlala kuyo bobabini kwakuso esa sitalato.
Ngokwengxelo yamapolisa ngokomlomo wawo kwisithili iOR Tambo uCaptain Welile Matyolo, indoda le ibiyeyenina eli lina 39, nelithe lakrokra ukuba isinqandamathe esi sinento yokwenza nomfi. Ze kwaqhambuka inxwabanxwaba kanye ngelo xesha ze inina eli lina 39 lakhupha imela londa ngaye limhlaba amanxeba aliqela kulo mzimba ungasentla.
Lo kaMatyolo uhambisa athi ixhoba lithe laswelekela apho kwindawo yexhwayelo. Ngelixa umtyholwa yena ethe wabanjwa ngosuku olundelayo nekulindeleke ukuba avele phambi kwamantyi kwinkundla zamatyala eMthatha.
